Məşhur modelyer Con Qalyano Nyu-Yorkdakı Metropoliten İncəsənət Muzeyində keçirilməsi planlaşdırılan fərdi sərgisindən rəsmən imtina edib. Qərar muzeyin dizaynerin yaradıcılığına həsr olunmuş sərgi keçirmək planının kəskin ictimai reaksiyaya səbəb olmasından sonra qəbul edilib.
Jnews.az xəbər verir ki, Qalyano “Instagram” hesabında yayımladığı bəyanatda bütün tərəflərlə aparılan müzakirələrdən sonra sərginin hazırda keçirilməməsinin daha məqsədəuyğun olduğu qənaətinə gəldiyini bildirib.
“Mən şəxsiyyətim ətrafındakı müzakirələrin Metropoliten muzeyini çətin vəziyyətə salmasını və ya Kostyum İnstitutunun görkəmli işindən diqqəti yayındırmasını istəmirəm”, – deyə dizayner bildirib.
Sərgiyə qarşı etirazlar
Muzeyin direktoru Maks Holleyn bazar ertəsi sərginin ləğv edildiyini təsdiqləyib.
Sərginin açılışının İsraildə Holokost qurbanlarının anım günü ilə eyni tarixə təsadüf edəcəyinin məlum olmasından sonra muzeyə qarşı tənqidlər daha da güclənib.
Ekspozisiyanın keçirilməsinə qarşı nüfuzlu donorlar, o cümlədən Elis Tiş, həmçinin Nyu-York Şəhər Şurasının spikeri Culi Menin və Konqresə namizəd Bred Lander kimi siyasətçilər çıxış ediblər.
Qalyanonun antisemit ifadələri
İctimai narazılığın əsas səbəblərindən biri Qalyanonun 2011-ci ildə Fransa məhkəməsi tərəfindən antisemit ifadələrinə görə mühakimə olunması ilə bağlı hadisələrdir.
Dizayner Parisdə baş verən iki ayrı insident zamanı bar ziyarətçilərini təhqir edib, antisemit ifadələr işlədib və Adolf Hitlerə rəğbət bəslədiyini bildirib. Hadisələrdən sonra Qalyano məhkəmə qarşısına çıxarılıb.
Anna Vintur sərgini müdafiə etmişdi
Daha əvvəl “Condé Nast” şirkətinin baş məzmun direktoru və Metropoliten muzeyinin qəyyumlar şurasının üzvü Anna Vintur Qalyanonun karyerasının yalnız bir hadisə ilə qiymətləndirilməməli olduğunu bildirərək sərginin keçirilməsi qərarını müdafiə etmişdi.
Lakin ictimaiyyətin və bir sıra rəsmi şəxslərin, o cümlədən Nyu-York meri Zoran Mamdaninin təzyiqləri planların yenidən nəzərdən keçirilməsinə səbəb olub.
Metropoliten muzeyindən bildirilib ki, Kostyum İnstitutunun yeni yaz sərgisi və 2027-ci il “Met Gala” tədbirinin təfərrüatları daha sonra açıqlanacaq.
Mənbə: algemeiner.com
