Həkimlər Həmkarlar İttifaqı Səhiyyə Nazirliyinə müraciət edərək tibbi preparatların və müalicə üsullarının yalançı reklamında həkimlərin ad və şəkillərindən istifadə hallarına qarşı tədbir görülməsini tələb edib. Bu barədə çərşənbə günü, iyunun 17-də “Kan” xəbər xidməti məlumat verib.
Müraciətdə bildirilir ki, son iki ildə sosial şəbəkələrdə süni intellektin köməyi ilə yaradılan videoroliklərin sayı kəskin artıb. Bu videolarda məşhur mütəxəssislərin adından dərmanlar, qida əlavələri və müxtəlif müalicə üsulları reklam edilir. Həm də real həkimlərin şəkilləri, səsləri və adları onların razılığı olmadan istifadə olunur.
Yalançı videolar sağlamlığın yaxşılaşdırılmasını, həyat keyfiyyətinin yüksəldilməsini və hətta müxtəlif xəstəliklərdən sağalmanı vəd edərək istifadəçiləri yanıltır.
Adı, şəkli və səsi bu kimi materiallarda istifadə olunan həkimlərdən biri koronavirusla mübarizənin keçmiş koordinatoru professor Roni Qamzu olub. 2023-cü ilin noyabr ayında o, müharibə nəticəsində zərər çəkənlərin fiziki reabilitasiyasına rəhbərlik etmək üçün təyin edilmişdi.
Bundan əlavə, kimya üzrə Nobel mükafatı laureatı professor Aaron Çexanover, məhkəmə tibb institutu rəhbəri professor Xen Kuqel (o, Facebook sosial şəbəkəsində obrazı, adı və səsindən istifadə olunan fırıldaqçı reklamın yayılmasına görə Meta korporasiyasına qarşı iddia qaldırıb), professor Qabi Barbaş və bir çox başqaları zərər çəkənlər arasında olub.
Müraciətin müəllifləri qeyd edirlər ki, söhbət yalan məlumatın yayılması üçün planlı və sistemli mexanizmdən gedir. Bu mexanizm vətəndaşların etibarından sui-istifadəyə və ciddi xroniki xəstəliklərdən əziyyət çəkən və ya təcili tibbi yardıma ehtiyacı olan insanların ağır vəziyyətindən istifadəyə əsaslanır. Onların sözlərinə görə, bu cür təcrübə həm vətəndaşların sağlamlığı, həm də onların maliyyə rifahı üçün ciddi təhlükə yaradır.