İsrail ordusu (SAXAL) Qəzza zolağının mərkəzi hissəsində həyata keçirdiyi dəqiq hava zərbəsi nəticəsində HƏMAS-ın snayper bölməsinin komandiri Ömər Əhməd Əbu-Qasimin öldürüldüyünü açıqlayıb.
SAXAL-ın yaydığı məlumata görə, Əbu-Qasim İsrail hərbçilərinə qarşı snayper hücumlarının və digər silahlı əməliyyatların planlaşdırılması və həyata keçirilməsində iştirak edib.
Bildirilib ki, əməliyyat İsrail hərbi kəşfiyyatının əldə etdiyi məlumatlar əsasında həyata keçirilib. Hava zərbəsi zamanı onun yanında olan daha bir silahlı şəxs də zərərsizləşdirilib.
İsrail ordusunun açıqlamasına əsasən, əməliyyatdan əvvəl hədəf ərazidə müşahidə və əlavə kəşfiyyat tədbirləri görülüb, mülki əhali üçün mümkün risklərin minimuma endirilməsi məqsədilə zərbənin icrası xüsusi dəqiqliklə planlaşdırılıb.
SAXAL həmçinin Qəzza zolağının digər bölgələrində də HƏMAS-ın komandirlərinə qarşı əməliyyatların davam etdirildiyini bildirib.
İsrail hərbçilərinə qarşı mövcud təhdidlərin aradan qaldırılması məqsədilə HƏMAS-a qarşı hərbi əməliyyatlar bundan sonra da davam etdiriləcəyi bildirilib.