London meri Sadiq Xan, 7 oktyabr 2023-cü ildə HƏMAS-ın İsrailə hücumu zamanı “Nova” musiqi festivalında baş verən dəhşətli hadisələri əks etdirən sərgini ziyarət edib. Səfər çərçivəsində mer hücumdan sağ qalanlar və həlak olanların yaxınları ilə bir araya gəlib.
May ayında Londonda qapılarını açan və ictimai maraq fonunda fəaliyyət müddəti uzadılan sərgi, festival zamanı baş verən faciənin təfərrüatlarını və həmin gün yaşanan ağrılı anları ziyarətçilərə çatdırır. 2023-cü il oktyabrın 7-də baş verən hücum nəticəsində təxminən 1200 nəfər həyatını itirmiş, onlardan 364-ü məhz “Nova” musiqi festivalı ərazisində və ya oradan xilas olmağa çalışarkən qətlə yetirilmişdi.
“İnsanları xatırlamaq vacibdir”
Səfər zamanı Sadiq Xan festivalın həmtəsisçisi Ofir Amir və hücumdan sağ çıxan britaniyalı Şon Börns ilə görüşüb. Hücum zamanı yaralanan Ofir Amir merə qeyd edib ki, festival iştirakçılarının sadəcə statistik rəqəmlər kimi deyil, dostları və doğmaları olan adi insanlar kimi xatırlanması onun üçün ən vacib istəkdir.
Sadiq Xan faciənin zaman keçdikcə unudulması təhlükəsinə diqqət çəkərək, bu cür sərgilərin yaddaşın qorunmasında oynadığı rolu yüksək qiymətləndirib.
“Zaman keçdikcə bu faciənin unudulması riski var. Ona görə də həmin günü yadda saxlamaq və həlak olanların xatirəsinə hörmət göstərmək bizim üçün mənəvi borcdur”.
Tarixi paralellər və birlik mesajı
London meri baş vermiş hadisəni 2017-ci ildə Mançesterdə Ariana Qrandenin konserti zamanı törədilən və 22 nəfərin ölümü ilə nəticələnən terror aktı ilə müqayisə edib. Sadiq Xan dünyada nifrət və ayrılıq toxumu səpməyə çalışan qüvvələrin çoxluğuna baxmayaraq, musiqinin və insanların bir araya gəlməsinin cəmiyyəti birləşdirən ən güclü dəyər olduğunu vurğulayıb.
Qeyd edək ki, Sadiq Xan daha əvvəl İsrailin Qəzzada həyata keçirdiyi hərbi əməliyyatları sərt tənqid edərək onları “soyqırımı” adlandırmışdı. Bununla belə, mer Londonda artan antisemitizm halları fonunda yəhudi icması ilə həmrəyliyini nümayiş etdirərək, şəhərdə hər bir icmanın təhlükəsizliyinə və birgəyaşayışına sadiq olduğunu bəyan edib.