ABŞ ordusu İran ərazisindəki strateji infrastruktura yenidən hərbi zərbələr endirib. Hörmüz boğazında beynəlxalq gəmiçiliyə qarşı artan təhdidlər fonunda Vaşinqton hərbi əməliyyatları bərpa edib. Bu addım tərəflər arasında mövcud olan atəşkəsi faktiki olaraq pozub və Yaxın Şərqdə gərginliyi yeni mərhələyə daşıyıb.
Gülistan körpülərinə raket zərbəsi
Jurnalist Barak Ravidin yaydığı məlumata görə, ABŞ hərbi təyyarələri İranın şimalında yerləşən iki dəmir yolu körpüsünə qanadlı raketlər atıb. Hədəflərdən biri Türkmənistan sərhədinə yaxın, şimal-qərbdəki Gülistan şəhərinin ərazisindədir. Mənbələr bildirir ki, bu, 8 aprel tarixindən etibarən ABŞ-ın İran infrastrukturuna endirdiyi ilk zərbədir.
Bundan bir qədər əvvəl isə ABŞ ilə İran arasında əldə olunmuş razılaşmaların icrası müvəqqəti olaraq dayandırılmışdı.
Bölgədə hərbi hazırlıq gücləndirilir
Vaşinqton eyni zamanda regiondakı hərbi mövcudluğunu artırmağa başlayıb. Daha əvvəl Avropaya göndərilmiş yanacaqdaşıyan hərbi təyyarələr geri çağrılıb və İsrail də daxil olmaqla Yaxın Şərqdəki bazalara yerləşdirilir. Müşahidəçilər bu addımı bölgədə uzunmüddətli əməliyyatlara hazırlıq siqnalı kimi dəyərləndirir. Ağ Evdə də qarşıdurmanın qısa müddətdə başa çatmayacağı ehtimalının ciddi şəkildə müzakirə olunduğu bildirilir.
“Hər şey Tehranın addımından asılıdır”
“Axios” nəşrinin məlumatına görə, ABŞ rəsmiləri yeni hərbi kampaniyanın həm müddətini, həm də miqyasını birbaşa Tehranın atacağı addımlara bağlayıb. Onların qiymətləndirməsinə görə, qarşıdurma bir neçə gün, bir neçə həftə, hətta aylarla davam edə bilər. Prosesin gedişi İranın Hörmüz boğazında kommersiya gəmilərinə hücumları dayandırıb-dayandırmamasından asılı olacaq. ABŞ hökumətindəki mənbələrdən biri vəziyyəti belə ifadə edib:
“Biz onlara zarafat etmədiyimizi göstərmək istəyirik”.
Xatırladaq ki, bu hadisələrdən əvvəl İranın ABŞ-ın bölgədəki hərbi bazalarına hücum etdiyi barədə də məlumatlar yayılmışdı. Mövcud dinamika Vaşinqton ilə Tehran arasındakı gərginliyin genişmiqyaslı hərbi qarşıdurma mərhələsinə keçə biləcəyini göstərir.