Nyu-Yorkda 2026-cı ilin iyul ayında qeydə alınan nifrət zəminində törədilən cinayətlərin böyük əksəriyyəti yəhudilərə qarşı yönəlib. Nyu-York Polis Departamentinin (NYPD) açıqladığı statistikaya görə, bu kateqoriyada təsdiqlənən cinayətlərin təxminən 70 faizi antisemit xarakter daşıyıb.
Rəsmi məlumata əsasən, polis araşdırmalarından sonra iyul ayında 33 hadisəni nifrət zəminində törədilmiş cinayət kimi təsnif edib. Həmin halların 23-ü və ya 69,7 faizi yəhudilərə qarşı yönəlib.
Ümumilikdə isə ay ərzində nifrət motivi ilə törədildiyi ehtimal olunan 50 hadisə barədə polisə müraciət daxil olub. Bu müraciətlərdən 29-u antisemit xarakterli insidentlərlə bağlı olub.
Statistikaya görə, ötən ilin iyul ayında qeydə alınmış 15 analoji hadisə ilə müqayisədə antisemit cinayətlərin sayı 53,3 faiz artıb. Bu artım xüsusilə diqqət çəkir, çünki yəhudilər Nyu-York şəhərinin ümumi əhalisinin təxminən 10 faizini təşkil edir.
İlin ilk yeddi ayını əhatə edən məlumatlar da bu tendensiyanın davam etdiyini göstərir. Belə ki, 2026-cı ilin yanvar–iyul aylarında şəhərdə ümumilikdə 360 nifrət zəminində törədilmiş cinayət təsdiqlənib ki, bu da ötən ilin eyni dövrü ilə müqayisədə 9,4 faiz çoxdur. Həmin cinayətlərin 205-i və ya 56,9 faizi yəhudilərə qarşı törədilib.
Bununla yanaşı, ilin əvvəlindən qeydə alınan antisemit cinayətlərin sayı 189-dan 205-ə yüksələrək 8,5 faiz artıb.
Nyu-York Şəhər Şurasının spikeri Culi Men JNS agentliyinə açıqlamasında şəhərin yəhudi icmasına qarşı nifrət zəminində törədilən cinayətlərin artmasından ciddi narahatlıq keçirdiyini bildirib.
Qeyd edək ki, bu statistika Nyu-Yorkda ümumi cinayət səviyyəsinin azalması fonunda açıqlanıb. Belə ki, 2026-cı ilin iyul ayında şəhərdə qeydə alınan ağır cinayətlərin sayı ötən ilin eyni ayı ilə müqayisədə 12,7 faiz azalıb.
Mənbə: newsru.co.il