İspaniyanın Şimali Afrikadakı muxtar şəhəri Seutada miqrasiya böhranı kritik həddə çatıb. Mərakeş sərhədindən şəhərə on minlərlə miqrantın daxil olmasından sonra bölgədə vəziyyət nəzarətdən çıxıb.
Məlumatlara görə, şəhərə daxil olan miqrantlarla təhlükəsizlik qüvvələri arasında baş verən qarşıdurmalar nəticəsində azı 19 nəfər həlak olub, onlarla insan isə yaralanıb. Şəhərə daxil olan 50 minə yaxın miqrantın bir hissəsinin avtomobilləri yandırdığı, mağazaları qarət etdiyi və küçələrdə iğtişaşlar törətdiyi bildirilir.
İspaniyanın Baş naziri Pedro Sançes hökumətin Seutada təhlükəsizliyi və ictimai asayişi təmin etmək üçün dövlətin bütün imkanlarından istifadə edəcəyini açıqlayıb. O, Madridin Seutaya dəstəyinin dəyişməz olduğunu vurğulayıb.
Hazırda şəhərdə fövqəladə vəziyyət elan edilib. Təhlükəsizlik qüvvələri şəhər sakinlərini zəruri ehtiyac olmadıqca evlərini tərk etməməyə çağırıb. Əlavə polis və hərbi qüvvələr isə strateji obyektlərin mühafizəsini gücləndirib.
Seutada baş verən hadisələr Avropada ciddi narahatlıq doğurub. İspaniya hökuməti və Avropa İttifaqı qurumları miqrasiya axınının qarşısının alınması və şəhərdə sabitliyin bərpası istiqamətində təcili tədbirləri müzakirə edirlər. Bu hadisələr son illərdə Avropanın üzləşdiyi ən böyük miqrasiya böhranlarından biri kimi qiymətləndirilir.
