Ukrayna Xəzər dənizində İran bayrağı altında üzən gəmiyə uzaqmənzilli PUA ilə zərbə endirdiyini açıqlayıb. Bu hadisə münaqişənin Qara dəniz regionundan kənara çıxaraq yeni coğrafiyaya yayılması baxımından diqqətçəkən inkişaf kimi qiymətləndirilir.
Ukrayna Prezidenti Volodimir Zelenskinin sözlərinə görə, hədəfə alınan gəmi İrandan Rusiyaya hərbi təyinatlı yüklər, o cümlədən pilotsuz uçuş aparatları (PUA) və raketlər üçün ehtiyat hissələri daşıyırmış. Kiyev iddia edir ki, həmin komponentlər sonradan Ukraynaya qarşı döyüş əməliyyatlarında istifadə olunacaqdı.
Ukrayna rəsmilərinin bildirdiyinə görə, vurulan gəmi formal olaraq mülki ticarət gəmisi olub.
İran tərəfi isə insident nəticəsində bir dənizçinin həlak olduğunu, daha bir nəfərin isə yaralandığını açıqlayıb.
İranın xarici işlər naziri Abbas Əraqçi isə Tehranın Rusiyaya hərbi yardım göstərdiyi barədə ittihamları rədd edərək, bu iddiaların əsassız olduğunu bildirib.
Baş verən hadisə Ukrayna ilə İran arasında onsuz da gərgin olan münasibətlərin daha da kəskinləşdiyini göstərir. Son aylarda Ukrayna və Qərb ölkələri İranın Rusiyaya pilotsuz uçuş aparatları və digər hərbi texnologiyalar təqdim etdiyini iddia etsələr də, Tehran bu ittihamları davamlı olaraq rədd edir.