Avropa İttifaqının (Aİ) antiinhisar tənzimləyicisi olan Avropa Komissiyası “Warner Bros. Discovery” (WBD) media holdinqinin “Paramount Skydance” tərəfindən 110 milyard ABŞ dollarına alınması ilə bağlı rəqabət baxımından heç bir maneə müəyyən etməyib. Bu barədə “Reuters” agentliyi məlumat yayıb.
Avropa Komissiyasının açıqlamasına görə, “Paramount Skydance” müqavilənin qüvvəyə minməsindən sonra 13 ay ərzində Avropada “Universal Pictures” ilə filmlərin yayımı üzrə birgə müəssisə olan “United International Pictures” (UIP) ilə əməkdaşlığı dayandırmağı öhdəsinə götürdüyündən, tənzimləyici orqan sövdələşməyə etiraz etməyib.
Razılaşmanın şərtlərinə əsasən, “Paramount Skydance” növbəti 10 il ərzində Avropada “Universal Pictures” ilə filmlərin distribüsiyası üzrə yeni müqavilə bağlamayacaq. Eyni zamanda, “Warner Bros.” filmlərinin Avropa kinoteatrlarında yayım hüquqları şirkətin öz distribütoruna veriləcək.
ABŞ-da sövdələşmə müvəqqəti dayandırılıb
Bununla yanaşı, ötən həftə ABŞ-ın Kaliforniya ştatının Oklend dairə məhkəməsi WBD-nin alınması prosesini 14 gün müddətinə dayandırıb. Hakim Araseli Martines-Olqin Kaliforniyanın baş prokuroru Rob Bonta və daha 11 ştatın baş prokurorunun birgə vəsatətini təmin edib.
İddiaçı tərəf hesab edir ki, bu birləşmə kinoprokat və kontentin lisenziyalaşdırılması bazarında rəqabəti zəiflədə və istehlakçılar üçün mənfi nəticələr yarada bilər.
Birləşməyə qarşı narahatlıqlar artır
“Warner Bros. Discovery”nin tərkibinə “Warner Bros.” kinostudiyası, “HBO”, “CNN”, “TNT Sports” və “Discovery” kimi televiziya kanalları və media xidmətləri daxildir.
Sövdələşmə baş tutacağı təqdirdə, bu aktivlər “Oracle” şirkətinin həmtəsisçisi Larri Ellisonun oğlu Devid Ellisonun nəzarətinə keçəcək. Daha əvvəl “NBC News” Donald Trampın Ellisonlar ailəsi haqqında müsbət fikirlər səsləndirdiyini və “CNN”in sahibliyinin dəyişdirilməsini dəstəklədiyini bildirmişdi.
Eyni zamanda, Amerika Ssenaristlər Gildiyası da birləşmənin ssenaristlərin gəlirlərinə mənfi təsir göstərə biləcəyini əsas gətirərək sövdələşməyə qarşı məhkəmə iddiası qaldırıb. Böyük Britaniya rəsmiləri isə ötən ay xəbər yayımı və uşaq proqramları bazarında mümkün mənfi təsirlərlə bağlı narahatlıqlarını ifadə edərək, zərurət yaranacağı təqdirdə prosesə müdaxilə edə biləcəklərini açıqlamışdılar.