ABŞ Silahlı Qüvvələrinin Mərkəzi Komandanlığı (CENTCOM) İrana qarşı ardıcıl 12 gecə davam edən hava zərbələri seriyasının başa çatdığını açıqlayıb.
CENTCOM-un yaydığı bəyanata görə, əməliyyat zamanı İranın müxtəlif hərbi obyektləri hədəfə alınıb. Zərbələr İran Hərbi Dəniz Qüvvələrinə məxsus obyektlərə, raket və pilotsuz uçuş aparatlarının saxlanıldığı anbarlara, sahil müşahidə məntəqələrinə, eləcə də hava hücumundan müdafiə (HHM) sistemlərinə endirilib.
Bəyanatda bildirilib ki, əməliyyat çərçivəsində müəyyən edilmiş bütün hərbi hədəflər uğurla vurulub və bununla da ardıcıl 12 gecə davam edən zərbələr seriyası başa çatdırılıb.
CENTCOM əməliyyatın nəticələri və hədəflərə dəyən zərərin miqyası ilə bağlı əlavə məlumat açıqlamayıb. İran tərəfi isə məsələ ilə bağlı hələlik rəsmi açıqlama verməyib.