İsrailin “Bank Hapoalim” və “Discount Bank” maliyyə qurumları Fələstin Muxtariyyətinin bank sistemi ilə müxbir əlaqələri müvəqqəti olaraq kəsməmək qərarına gəliblər.
Qərar İsrail Mərkəzi Bankının xahişi ilə qəbul edilib. Məqsəd tərəflər arasında ticarət əməliyyatlarının dayanmasının və bunun nəticəsində genişmiqyaslı iqtisadi böhranın yaranmasının qarşısını almaqdır.
Məlumata görə, sözügedən banklar vasitəsilə hər il 20 milyard şekeldən çox həcmdə mal və xidmətlərə görə ödənişlər həyata keçirilir. Əlaqələrin tamamilə dayandırılması Qərb Sahilində ticarətin əhəmiyyətli hissəsinin dayanmasına və ciddi likvidlik böhranının yaranmasına səbəb ola bilər. Bu vəziyyətin İsrail şirkətlərinə də mənfi təsir göstərəcəyi bildirilir.
İsrailin kommersiya bankları bir neçə ildir Fələstin bank sistemi ilə əməkdaşlığın dayandırılmasını tələb edirlər. Banklar buna yüksək hüquqi riskləri, həmçinin çirkli pulların yuyulması və terrorçuluğun maliyyələşdirilməsinə qarşı beynəlxalq tələbləri əsas gətirirlər.
Əvvəllər maliyyə qurumları yalnız onları hüquqi məsuliyyətdən azad edən dövlət zəmanətləri olduğu halda bu əməkdaşlığı davam etdirirdilər. Lakin son aylarda həmin öhdəliklərin qısamüddətli xarakter daşıması səbəbindən qeyri-müəyyənliyin artdığı qeyd olunur.
İsrail hökuməti bu əməliyyatların idarə edilməsini xüsusi yaradılmış dövlət şirkətinə həvalə etməyi planlaşdırırdı. Bununla özəl bankların hüquqi məsuliyyətdən azad edilməsi nəzərdə tutulurdu. Lakin bürokratik və qanunvericiliklə bağlı gecikmələr səbəbindən həmin struktur hələ fəaliyyətə başlamayıb.
Mənbə: 9tv.co.il
