“Amerikanın Demokratik Sosialistləri” (DSA) hərəkatı bu həftə özünün “İşçilər daha çoxuna layiqdir” adlı milli proqramını təqdim edib. Proqramda “fələstinlilərin hərbi işğala qarşı müqavimət hüququ”na dəstək rəsmən təsbit olunub. Sənəddə, həmçinin İsrailə edilən istənilən hərbi və iqtisadi yardımın dayandırılması, eləcə də ABŞ və İsrail liderlərinin “Qəzzada törədilən soyqırıma görə” məsuliyyətə cəlb edilməsi çağırışları yer alıb.
Fələstin-İsrail münaqişəsi ilə bağlı mövqe
DSA-nın proqramı bütün fələstinli qaçqınların və onların nəsillərinin İsrail ərazisinə “geri qayıtmaq hüququ”nun tanınmasını tələb edir. Bundan əlavə, hərəkat “paytaxtı Qüds olan azad Fələstində öz müqəddəratını təyin etmək hüququ”nu müdafiə edir. Sənəddə İsrailin tanınması ilə bağlı hər hansı bir qeyd və ya xatırlatma yoxdur.
Digər siyasi məqsədlər
Xarici siyasətdə DSA ABŞ Müdafiə Nazirliyinin maliyyələşdirilməsinin azaldılmasına, xarici hərbi bazaların bağlanmasına, habelə Kuba, Venesuela və İrana qarşı tətbiq edilən embarqonun ləğvinə çağırır. Ölkə daxilində hərəkat Senatın ləğv edilməsini, ikipartiyalı sistemə son qoyulmasını, prezident və Ali Məhkəmə postlarının Nümayəndələr Palatasına hesabat verən yeni orqanlarla əvəzlənməsini təklif edir.
İqtisadi tələblər arasında aparıcı korporasiyaların dövlət mülkiyyətinə keçirilməsi, “sərvətə qarşı aqressiv vergilər” və 32 saatlıq iş həftəsi yer alır. DSA-nın dəstəyi ilə seçkilərdə iştirak edəcək namizədlər artıq bu platformanı dəstəkləməyə borcludurlar. Hərəkatın tərkibinə ABŞ Nümayəndələr Palatasının üzvü Aleksandra Okasio-Kortes və Nyu-Yorkun meri Zoran Mamdani kimi siyasətçilər daxildir.
Mənbə: timesofisrael.com