Yenilənib: Avqust 10, 2026 8:04 axşam
İsrail Müdafiə Qüvvələrinin (SAXAL) ərəb dilli mətbuat katibi Ella Vaviya Qəzza sakinlərinə müraciət edərək köhnə nümunəli şekel əskinaslarının yaxın vaxtlarda dövriyyədən tamamilə çıxarılacağı barədə xəbərdarlıq edib.
Vaviyanın sözlərinə görə, bu əskinasların böyük hissəsi artıq yeni nümunəli pul nişanları ilə əvəzlənib. Buna görə də köhnə əskinasları əlində saxlayan şəxslər pullarını itirmək riski ilə üzləşə bilərlər.
SAXAL-ın açıqlamasında bildirilir ki, HƏMAS rəhbərliyi vəziyyətdən xəbərdardır və əlindəki köhnə əskinaslardan qurtulmağa çalışır. İsrail ordusunun iddiasına görə, təşkilat rəhbərliyi yeni nümunəli əskinasları özündə saxlayır, Qəzzadakı sıravi sakinlər və döyüşçülərlə isə dövriyyədən çıxarılması planlaşdırılan köhnə pullarla hesablaşır.
“Köhnə əskinaslarla maaş və ya ödəniş almağa razılaşmayın. HƏMAS rəhbərliyinin öz itkilərinin nəticələrini sizin üzərinizə qoymasına imkan verməyin”, – deyə Vaviya bildirib.
Qəzzada nağd pul dövriyyəsi ilə bağlı vəziyyət daha əvvəl də tənzimləyici qurumların diqqətində olub. İsrail Bankına Qəzza ərazisində dövriyyədə olan 200 şekellik əskinasların ləğv edilməsi təklif olunmuşdu.
Bu fonda 200 şekellik əskinasların dövriyyədən çıxarılacağı ilə bağlı yayılan xəbərlər nəticəsində artıq maliyyə dövriyyəsindən təxminən 5 milyard şekelin çıxarıldığı bildirilir.
Bununla yanaşı, son həftələrdə bazarda 100 şekellik nominalda saxta əskinasların sayında da kəskin artım qeydə alınıb.
