Yenilənib: Sentyabr 9, 2026 11:07 səhər
Azərbaycanın Xalq artisti, tanınmış rejissor və aktyor Aleksandr Şarovski vəfat edib.
Jnews.az xəbər verir ki, sənətkarın vəfatı ilə bağlı Birinci vitse-prezident Mehriban Əliyeva başsağlığı verib.
“Aleksandr Yakovleviç Şarovski. Məkanın cənnət olsun, böyük Ustad!” – Mehriban Əliyeva sosial şəbəkə hesabında yazıb.
Aleksandr Şarovski 10 fevral 1948-ci ildə Bakıda anadan olub. O, 1967-ci ildən Azərbaycan Dövlət Gənc Tamaşaçılar Teatrında aktyor kimi fəaliyyətə başlayıb. 1976-cı ildən Azərbaycan Dövlət Rus Dram Teatrında çalışan Şarovski 1991-ci ildən quruluşçu rejissor, 1993-cü ildən isə teatrın baş rejissoru olub.
Xalq artisti uzun illər ərzində Azərbaycan teatr sənətinin inkişafına mühüm töhfələr verib. O, səhnədə 50-dən çox obraz yaradıb, 4 filmdə çəkilib və 54 tamaşaya quruluş verib. Şarovski 1988-ci ildə “Əməkdar artist”, 1998-ci ildə isə “Xalq artisti” fəxri adlarına layiq görülüb. O, həmçinin “Şöhrət” və “Şərəf” ordenləri, “Qızıl Dərviş” və “Humay” mükafatları ilə təltif edilib.
Aleksandr Şarovski Bakı Avropa Yəhudiləri Dini İcmasının rəhbəri kimi də fəaliyyət göstərib.
Jnews.az kollektivi Azərbaycanın tanınmış sənətkarının vəfatından dərin kədər hissi keçirir, mərhumun ailəsinə, yaxınlarına, dostlarına və sənət yoldaşlarına dərin hüznlə başsağlığı verir. Allah rəhmət eləsin!
