Avqustun 31-də axşam “Bloomfield” stadionunda İsrail futbol çempionatının ikinci turunun mərkəzi qarşılaşması keçirilib. Oyunda Təl-Əvivin “Makkabi” klubu Hayfanın “Makkabi” komandasını 3:1 hesabı ilə məğlub edib.
Jnews.az xəbər verir ki, matçda hesab 14-cü dəqiqədə açılıb. Təl-Əviv təmsilçisinin yarımmüdafiəçisi Dor Peres penalti zərbəsini dəqiq yerinə yetirib.
Birinci hissənin başa çatmasına beş dəqiqə qalmış – 40-cı dəqiqədə Peres daha bir qol vuraraq dubl edib və komandasının üstünlüyünü artırıb.
İkinci hissədə, 72-ci dəqiqədə Oşer Davida Dor Peresin ötürməsindən sonra Hayfa klubunun qapısına üçüncü qolu vurub. Qonaqlar yalnız 88-ci dəqiqədə fərqlənə biliblər. Eytan Azulay penalti zərbəsini dəqiq yerinə yetirərək yekun hesabı 3:1 müəyyənləşdirib.
Dor Peres bombardirlər siyahısında liderdir
Dor Peres üçün bu oyun onun məhsuldar seriyasının davamı olub. O, daha əvvəl ilk turda Yerusəlimin “Hapoel” klubuna qarşı keçirilən və 5:2 hesabı ilə başa çatan görüşdə het-trik edib.
Hazırda Peresin İsrail çempionatında iki oyundan sonra hesabında beş qol var. Bu nəticə ona bombardirlər siyahısında liderlik etməyə imkan verir.
Futbolçu cari mövsümün əvvəlindən etibarən bütün turnirlərdə ümumilikdə doqquz qol vurub.
Mənbə: newsru.co.il
