İsrail Müdafiə Qüvvələri (SAXAL) orduda əlavə döyüş hazırlığı rejiminin elan edilmədiyini açıqlayıb.
SAXAL-ın yaydığı məlumatda qeyd olunub ki, hazırda hərbi qüvvələrin fəaliyyətində hər hansı dəyişiklik yoxdur və xidmət əvvəlki qaydada davam etdirilir. Bildirilib ki, mövcud vəziyyət xüsusi fövqəladə hazırlıq rejiminə keçməyi tələb etmir.
SAXAL vurğulayıb ki, İsrail uzun illərdir İran tərəfindən mövcud təhlükəni nəzərə alaraq daimi yüksək hazırlıq vəziyyətində fəaliyyət göstərir və hazırkı şəraitdə əlavə tədbirlərə ehtiyac yaranmayıb.
Bu açıqlama ABŞ-ın İrandakı bir sıra hərbi hədəflərə endirdiyi zərbələrdən sonra regionda gərginliyin artdığı bir vaxta təsadüf edir.
Bu arada İranın İnqilab Keşikçiləri Korpusu ABŞ-ın Yaxın Şərqdə yerləşən hərbi bazalarına raket və pilotsuz uçuş aparatları ilə zərbələr endirdiyini açıqlayıb. Tehran bu hücumların ABŞ-ın əvvəlki hərbi əməliyyatlarına cavab xarakteri daşıdığını bildirərək, zərurət yaranacağı təqdirdə əməliyyatların davam etdirilə biləcəyini bəyan edib.
ABŞ isə öz növbəsində açıqlayıb ki, Hörmüz boğazında beynəlxalq gəmiçiliyin təhlükəsizliyini təmin etmək məqsədilə İrandakı hərbi hədəflərə zərbələr endirilib. Pentaqonun məlumatına görə, son sutka ərzində həyata keçirilən hava əməliyyatları zamanı hava hücumundan müdafiə sistemləri, hərbi dəniz bazaları, raket kompleksləri və pilotsuz uçuş aparatlarının saxlanıldığı anbarlar da daxil olmaqla ümumilikdə 80 hərbi obyekt məhv edilib.