Ermənistan Milli Məclisinin sədri Alen Simonyan yeni çağırış parlamentdə təmsil olunmayacağını və deputat mandatından rəsmən imtina etdiyini açıqlayıb. Bu barədə spiker bu gün jurnalistlərə keçirdiyi brifinqdə məlumat verib.
Simonyan qərarının pərdəarxasını açaraq bildirib ki, o, yeni parlamentdə də spiker vəzifəsini davam etdirmək niyyətində olub, lakin rəhbərlik etdiyi hakim Vətəndaş Müqaviləsi Partiyasının idarə heyəti bu posta başqa namizədi irəli sürməyə qərar verib:
“Mandatı götürməyəcəm və sıravi deputat kimi fəaliyyət göstərmək üçün Milli Məclisə gəlməyəcəm. Partiyanın qərarı fərqli oldu. Mən komanda adamıyam və partiyamın qərarına tabe oluram”.
Partiyanın qərarına əsasən, Alen Simonyanı parlament sədri postunda hazırkı vitse-spiker Ruben Rubinyan əvəz edəcək.
Gələcək planlarından danışan A. Simonyan, müharibədən sonrakı olduqca çətin və gərgin bir dövrdə parlamentə rəhbərlik etdiyini xatırladıb və hazırda bir müddət dincəlməyə, şəxsi həyatına vaxt ayırmağa ehtiyacı olduğunu vurğulayıb. O, həmçinin mediada yayılan Ermənistan prezidenti postuna keçəcəyi ilə bağlı şayiələri də təkzib edib.