London meri Sadiq Xan İsrailin Qəzza zolağında soyqırımı törətməsi barədə son bəyanatlarına görə kəskin tənqid olunub. Yəhudi ictimaiyyətinin nümayəndələri və siyasi rəqiblərinin fikrincə, bu cür əsassız ittihamlar Böyük Britaniyada antisemitizm əhval-ruhiyyəsinin artmasına təkan verir.
Qınağa səbəb Sadiq Xanın keçən həftə “Channel 4 News” telekanalının efirindəki çıxışı olub.
“Mən həqiqətən də Qəzzada soyqırımı törədildiyini hesab edirəm. Düşünürəm ki, Netanyahu məsuliyyət daşıyır və soyqırımı təqsirkarı kimi, zənnimcə, o, qanunu pozub”, – deyə London meri bildirib.
London Assambleyasında mühafizəkarların lideri Süzan Holl bu sözləri “qəsdən yalan” adlandırıb. Onun fikrincə, İsrailin hərəkətlərini soyqırımı kimi təsnif etmək olmaz, çünki İsrail ordusu mülki əhali arasında itkiləri minimuma endirməyə çalışır. HƏMAS mövqələrinə zərbələr endirməzdən əvvəl mülki şəxslərə zəng edilir, mətn mesajları göndərilir və xəbərdarlıq vərəqələri atılır. Holl vurğulayıb ki, merin bəyanatları Londonda artan antisemitizmi daha da qızışdırır.
Daxili siyasətin tənqidi
Süzan Holl həmçinin Sadiq Xanın mer vəzifəsində onillik fəaliyyətinin nəticələrini kəskin tənqid edərək, onun birbaşa öhdəliklərindən kənarlaşdığını bildirib. Onun təqdim etdiyi məlumatlara görə, o, vəzifəyə gəldiyi vaxtdan bəri Londonda cinayətkarlığın səviyyəsi 26% artıb.
Bununla yanaşı, şəhərin nəqliyyat sistemində 156 tətil baş verib ki, bu da əvvəlki 16 ilin göstəricilərindən üç dəfə çoxdur. Meriya həmçinin mənzil proqramının uğursuzluğunda ittiham olunur: 151 min əlçatan evin tikintisi üçün əvvəlki hökumətdən 8,82 milyard funt-sterlinq alınmasına baxmayaraq, hazırda 90 mindən az obyektin tikintisi başa çatdırılıb.
Mənbə: thejc.com
