Yenilənib: Avqust 18, 2026 10:18 səhər
Donald Tramp Hörmüz boğazını ABŞ ərazisi elan etmək ideyasını yenidən gündəmə gətirib və Vaşinqtonun hazırda bu strateji su yoluna tam nəzarət etdiyini bildirib.
Ağ Evin yaydığı məlumata görə, Tramp çıxışı zamanı Hörmüz boğazının ABŞ ərazisi elan edilməsi ideyasının ona hələ də maraqlı olduğunu deyib.
“Biz hər həftə milyonlarla barel neft daşıyırıq. Bu, bəlkə də dayanacaq, bəlkə də boğaz daha geniş şəkildə açılacaq”, – deyə Tramp bildirib.
Onun sözlərinə görə, Hörmüz boğazında gəmiçilik davam edir və neftin qiyməti aşağı düşür.
“Qiymətlər düşür və biz indi etdiklərimizdən daha radikal addımlar atmaq qərarına gəlməsək, düşməyə davam edəcək”, – ABŞ prezidenti qeyd edib.
Tramp həmçinin İrandakı vəziyyətə toxunaraq ölkənin ciddi problemlərlə üzləşdiyini, daxildə iğtişaşların baş verdiyini və İran ordusunun ağır zərbələr aldığını iddia edib.
Bununla yanaşı, ABŞ prezidenti Vaşinqtonun İranla qarşılıqlı anlaşma memorandumunun müddətini uzatmağa çalışmadığını bildirib. Onun sözlərinə görə, ABŞ hazırkı mərhələdə Tehranla həmin razılaşmanın davam etdirilməsində maraqlı deyil.
